LAOAG CITY – Dua nga opsyon ti makitkita ni Prof. Karl Lenin Benigno, maysa a Political Analyst a mabalin a solusyon seknan iti isyu iti Barangay ken Sangguniang Kabataan Election.
Karaman ditoy ti panangilatang ti naan-anay a pondo para barangay ken SK elections, ken ti pannakaiyalud-od ti termino dagiti opisyal iti barangay.
Inpetteng ni Benigno a tunggal malpas ti national elections ket sumarsaruno met ti lungalong a maitantan ti eleksyon iti barangay gapo iti nagduduma a rason kas iti pondo.
Inpalgak na a kada maitantan ti eleksyon iti barangay ket maik-ikkatan met ti karbengan dagiti tattao nga agpili ti kayat da a mangidaulo kadakuada, kasta pay ti karbengan dagiti agkalikagom nga agpaidasig nangruna dagiti kwalipikado.
Inbatad na a maysa pay a wagas a makitkita na ket iti pannakaipalawa pay ti impluwensya dagiti naelektaran nga opisyal ket ti pannakaiyalud-od ti termino dagiti barangay officials.
Mainaig iti daytoy, saan nga umanamong ni Benigno iti ideya a no maitantan ti eleksyon ket makainot ti binilyon ti gobierno nangruna ket kalintegan dagiti tattao ti agpili.
Kabayatanna, kuna na a ti pannakaitantan ti eleksyon iti barangay ket saan met nga isu ti rason ti gulo iti pulitika ngem no kanayon a kastoy ti mapasamak ket posible nga adda ti agabuso.
Malaksid iti daytoy, inbatad na a daytoy ti mangited ti kolor ti klase ti pulitika nga adda ditoy Pilipinas.
