LAOAG CITY – Inrakurak ni Akbayan Partylist Rep. Chel Diokno a maysa ni Ramil Madriaga iti napateg a testigo iti imbestigasion ti Kamara de Representantes kontra ken ni Vice President Sara Duterte.
Inbatad ni Diokno, masapul a personal a mangngeg ti House Committee on Justice ti testimonia ni Madriaga tapno mapaneknekan ti linaon ti affidavit mainaig iti maipagarup a saan nga umno a panagusar ti confidential funds iti Office of the Vice President ken Department of Education.
Ni Madriaga, a maitudtudo a “bagman,” ket agdama a nakabalud idiay Taguig gapu iti kaso a kidnapping ken manamnama a sumango iti komite inton Abril 14.
Kuna ni Diokno, ti testimonia daytoy ti mabalin a mangpatibker iti reklamo wenno mangitunda ti panangibasura ti kaso.
Adda iti umuna a tukad pay laeng ti imbestigasion tapno ammoen no adda ti umdas a pagibasaran sakbay daytoy nga iyuli iti Senado.
