LAOAG CITY – Inpila ti grupo dagiti padi, religious groups ken lawyers ti maikatlo nga impeachment complaint kontra ken ni Vice President Sara Duterte gapu iti maipagarop a betrayal of public trust, graft and corruption, ken dadduma pay.
Daytoy ket mainaig iti maipagarop a saan nga usto a pannakausar ti agarop P612 million a balor ti confidential funds.
Inlawlawag ni Atty. Amando Virgil Ligutan, counsel dagiti complainants, a ti inpila da nga impeachment complaint ken inbasar da iti nagbalin a duktal ti House good government and public accountability committee iti confidential fund ti Office of the Vice President (OVP) ken ti Department of Education iti babaen ti liderato ni Duterte, kasta pay ti panangpangta na a papatayen ni President Ferdinand Marcos Jr., ken ti akusasyon ni a Ramil Madriaga a nagusar ti bise presidente ti kwarta manipod iti droga.
Ti maikatlo nga impeachment complaint ket inyendorsar ni House Deputy Minority Leader and Mamamayang Liberal party-list Representative Leila de Lima.
Inpetteng ni de Lima a kas bise presidente ken sekretaryo idi iti Department of Education, dakkel ti nagbalin nga akem ni Duterte iti pannakaaprubar ken pannakatingiting ti implementasyon dagiti programa iti dua nga opisin nga indaulwan na.
Innayon na a no awan ti pammalubos na ket saan a naiparuk-at ti confidential funds ti opisina na.
Iti met biang ni Fr. Bong Sarabia, maysa kadagiti complainants, a ti proseso ti impeachment ket wagas tapno sungbatan ti bise presidente dagiti saan pay a nasungbatan a saludsud no kasanu ken ania dagiti nakausaran ti public funds, karaman ti confidential funds dagiti indaulwan na nga opisina.
