LAOAG CITY – Inpasigurado ni Mrs. Adella Rebulledo, Municipal Treasurer ken incharge kadagiti makmakan iti nagduduma a isolation facilities iti ili ti Paoay a maimbetigar ti maipagarop a nabangles a makan a naited kadagiti naka-quarantine iti Barangay Veronica iti nasao nga ili.
Segun kenni Rebulledo, maymaysa laeng a food provider ti agit-ited kadagiti nagduduma nga isolation facilities iti nadakamat nga ili.
Daytoy ket kalpasan nga adda ti naipadanon nga impormasyon a namitlon a daras a nakaawat ti maipagarop a nabangles a makan ti pamilya a naka-isolate iti Barangay Isolation Unit iti Barangay Veronica.
Inbatad na nga iti panagdamdamag na kadagiti sumagmamano pay nga isolation facility ket awan ti reklamo nga adda ti nabangles a makan.
Nupay kasta, itultuloy na latta ti agimbestigar tapno masolbar daytoy a banag.
Ummunan nga inbatad ni Barangay Chairman Geraldine Llaguno iti nasao a barangay a ti naka-isolate a pamilya iti BIU da ket isu ti naggapoan ti video ken isu ti nakaawat ti maipagarop a nabangles a makan.
Rumrumuar a rason iti daytoy ket gapo ta maudi a mabunungan ti makan ti Barangay Veronica.
