LAOAG CITY – Inpakaammo ti maysa a Private Lawyer a ni Atty. Juanito Antonio a rumbeng a mairaman dagiti co-perpetrators ni dati a Presidente Rodrigo Duterte iti war on drugs iti pannakausig ti Crimes Against Humanity.
Segun kenkuana, nasken laeng a maimbestigaran dagiti amin nga adda ti pakainaganna iti panangipatungpal ni dati a Presidente Duterte ti war on drugs no sadinno a simmurotda kadagiti pammilin ti dati a Presidente maipapan iti maipagarup a panangpapatay kadagiti suspek iti iligal a droga.
Inbatadna a saan pulos a nainkalintegan iti panangibilin kadagiti adda iti babaen ti panangpapatay iti maysa nga indibidual gapu laeng iti iligal a droga.
Inlawlawagna a dakkel ti posibilidadna nga addanto met ti maiparuk-at nga arrest warrant kontra kadagiti co-perpetrators ni dati a Presidente Duterte.
Maipalagip a pormalen nga inbasura ti International Criminal Court (ICC) Appeals Chamber ti apela ni dati a Presidente Duterte a mangkarkarit iti jurisdiction ti international tribunal a mangtengngel ken imbestigaren ti kasona.
