LAOAG CITY – Posible nga iparuk-aten ti Malacañang inton sumaruno a lawas ti desision daytoy mainaig iti report ti Independent Commission for Infrastructure (ICI).
Daytoy ket kalpasan nga insubmitir ti komision ti sumurok maysa a ribu a panid nga accomplishment report iti Palasyo.
Inbatad ni Palace Press Officer ken Presidential Communications Office (PCO) Undersecretary Claire Castro a nairekomendaren iti Office of the Executive Secretary nga agtignay maipanggep iti daytoy.
Sakupen ti report ti resulta ti tallo a bulan nga imbestigasion ti Independent Commission for Infrastructure kadagiti nagduduma nga infrastructure projects ti gobierno pakairamanan ti flood control projects.
Naammoan nga apaman a naiparuk-aten ti desision, maammoan no ituloy pay ti komision wenno naan-anayen nga ikkaten.
