LAOAG CITY – Inrakurak ti Malacañang a saan a basta maipasardeng ti panagibunong ti Ayuda para sa Kapos ang Kita Program o AKAP ita a panawen ti kampanya.
Segun ken ni Palace Press Officer Usec Claire Castro, ado dagiti Pilipino a mangnamnama iti nasao nga ayuda tapno adda ti pangalaan da iti usaren da iti inaldaw-aldaw.
Kuna na pay a rimuar iti survey nga ado a Pilipino ti mabisbisin iti baet ti naruay a programa ti gobierno kontra iti panagbisin.
Gapu iti daytoy, saan a daus a masuspenso ti distribusyon ti Ayuda para sa Kapos ang Kita Program, kangrunaan na ket mabalin a kontraen daytoy dagiti benepisyaryo a nabayagen a mangnamnama iti programa.
Maipalagip nga iti napalabas a lawas, sumagmamano a grupo ti nagpila ti petisyon iti Korte Suprema a mangkidkiddaw ti temporary restraining order iti panangipatungpal ti Ayuda para sa Kapos ang Kita Program gapu ta maipagarop nga agserserbi a congressional pork barrel.
Iti laeng napalabas ket nangiparuk-at ti Commission on Elections ti certificate of exemption iti spending ban ita nga eleksyon iti sumagmamano a programa ti Department of Social Welfare and Development a pakairamanan ti Ayuda para sa Kapos ang Kita Program.
