LAOAG CITY – Inpetteng ni House trial spokesperson ken impeachment adviser Robert Ace Barbers a napaneknekan ita a dagiti naawagan ti “Maleta Boys” ket maus-usar laeng tapno perdien dagiti miembro ti house prosecution team ken dadduma pay nga opisial ti gobierno.
Inpaganetget ni Barbers daytoy kalpasan a simmanud ken inbabawi ti testimonia ti uppat kadagiti 18 a maleta boys nga isuda ti nangipakaammo ti panangawat kadagiti maleta a napno ti kuarta ti sumagmamano a personalildad.
Inbatadna a gapu iti daytoy ket nalawag nga adda ti nagisagana ti script ti maleta boys tapno mangirakurak kadagiti kinaulbod ken awan ti pagibasaran nga alegasion.
Mamati ni Barbers a nakonsensia ti uppat a maleta boys isut gapuna a bimmaliktad ken napaay dagiti nag-recruit a tungpalen ti rewards a naikari kadakuada.
Patien ni Barbers a ti addang ti uppat a maleta boys ket aad-adda a mangpapigsa iti kredibilidad ti prosekusion nga isu ti mangig-iggem ti impeachment case kontra ken ni Vice President Sara Duterte.
