LAOAG CITY – Saan nga umanamong ni Mrs. Cathy Estavillo, ti pannakangiwat ti Bantay Bigas iti manamnama a panangipasdek ti gobierno ti Pax Silica project ditoy pagilian.
Saanna a maipeksa ti ungetna gapu ta daytoy nga Artificial Intelleigence Hub (AI Hub) ket manamnama a maipasdek kadagiti daga dagiti mannalon a paggapgapuanan ti pagsapulanda.
Segun kenkuana, saan nga umno a dagiti taga sabali pagilian ti naruay a mabenepisiaran kadagiti daga ken idinto a dagiti lokal a mannalon ket maawananda ti pagtaengan ken pagsapulan.
Inbatad ni Mrs. Cathy a ti nasao nga Pax Silica project ket agarup masapolna ti 1,620 nga ektaria a daga a kayatna a saoen, ado dagiti mannalon ken grupo dagiti Indigenous People ti mapektaran.
Malaksid iti daytoy, masapol pay ti nasao a proyekto ti minilyon a litro ti danum iti kada aldaw tapno maka-operate a kunana a saan a kabaelan ti pagilian ti makaptaud ti kastoy a kaado ti danum iti kada aldaw gapu ta iti agdama, adda dagiti mannalon nga agpanpanawagan ti kinakurang ti danum kadagiti talonda.
Ket no matuloy ti pannakaipasdek ti Pax Silica project ket ad-adda a makaapektar daytoy saan laeng a kadagiti mannalon no diketdi kadagiti tao nga aggagatang iti taraon.
Gapu iti daytoy, kinunana a dakkel a saludsod para kadagiti Pilipino ti paggapuan ti mausar a danum gapo ta kanayun a mapaspasaran ti El Niño ditoy pagilian.
Inpettengna a ti plano ti gobierno a mangipasdek ti rain-catch water system ket saan nga umdas iti inaldaw a danum a kasapulan ti nasao a proyekto.
Gapu iti daytoy, inpanagetgetna a saan a masapol ti pannakaituloy ti panangipasdek ti Pax Silica project ditoy pagilian gapu ta malaksid iti pannakaapektarna daytoy kadagiti talon dagiti mannalon ket mabalin a maapektaranna pay ti suplay ti danum kadagiti babbalay.
