LAOAG CITY – Kiniddel ti maysa a mangisursuro ti mismo nga adalan na iti Paoay Faith Academy ti nasao nga ili.
Kinumpirmaran daytoy iti Bombo Radyo Laoag ni Mrs. Angel Anga-angan, ti mismo nga ina ti saanen a nadakamat nga ubing, ken residente iti Brgy. Balacad ditoy ciudad ti Laoag.
Basar iti palawag ni Mrs. Anga-angan, bayat ti panangsukat ti lola ti nasao nga ubing ti uniporme na manipod iti pagadalan ket dita a nakita na ti tallo a lamma iti bakrang na.
Kunana a sinaludsod ti lola no naan-ano ti ubing ket insungbat na a kiniddel ti maestra na a ni Ms. Deborah Eclarin, ti school supervisor ken tutorial teacher dagiti ubbing iti nasao a pagadalan.
Mainaig iti daytoy, nagkedked nga agpa-interview ni Eclarin ngem inadmitir na a kiniddel na ti ubing gapu ta saan na a masursurutan dagiti isursuro na kenkuana, ken makaturturog daytoy iti klase da.
Inlawlawag ni Eclarin a naaramid na laeng ti nasao a banag gapu ta kalikagum na nga isuro a nasayaat ti ubing ken binugtak na laeng daytoy tapnu dumngeg iti klase da.
Kinuna ni Eclarin a nagpadispensaren daytoy kadagiti nagannak ti ubing ken nailawlawag nanti napasamak.
Nopay kasta basar iti ina ti biktima kalikagum da nga idanun daytoy iti Dep ed ken nakaskedyul nga agturong da iti nasau nga opisina inton lunes.
