LAOAG CITY – Natalged a nagpaigid iti baybay ti maysa a mangngalap kalpasan a sinaplitan ti napigsa a dalluyon ti nagluganan na a bangka kabayatan ti kaadda na iti tengnga ti baybay paset ti Barangay Saud ili ti Pagudpud.
Daytoy ti nangitunda iti pannakaibbat na ti pagkakaud na agingga a dagiti napipigsa nga allon ti baybay ti nangiturong kenkuana.
Nabigbig daytoy a ni Sadiri Claro, agtawen ti 60, residente iti Barangay Saud iti ili ti Pagudpud.
Segun ken ni Police Executive Master Seargent Diomedes M. Ancheta, Deputy Chief of Police iti ili ti Bangui, napan nagkalap ni Claro idi rabii ti Martes Pebrero 4 ngem saanna a ninamnama a dumawel ti baybay.
Inlawlawag na a gapu iti kinapigsa ti angin ken dimmawel ti baybay ket naibbatan na ti pagkakaud na.
Gapu iti napasamak ket naibukbuk amin a nakalapan ni Claro ngem nasalbar na amin a sigay na.
Inbatad ni Ancheta nga immabot ti nasurok a siyam nga oras sakbay a nakapaigid ni Claro iti baybay iti paseten ti Barangay Tagipuro iti ili ti Bangui.
Kuna pay ni Ancheta nga idi mabirukan da ni Claro ket awan ti nakita da a sugat ngem madlaw a nakapsot gapu iti puyat ken bannog na.
