LAOAG CITY – Inallukoy ni Manila Representative Bienvenido Abante Jr. dagiti senador nga ilawlawag ti P24 billion a leadership fund a nailatang kadagitoy iti babaen ti 2025 national budget.
Basar ken ni Abante, rumbeng nga ilawlawag dagiti senador no kasano nabukel ti nadakamat nga alokasion, no siasinno ti nagawat ken nanggundaway iti daytoy ken no sadinno wenno kasano a nagastos daytoy.
Kunana a kasapulan a kitaen a nalaing no ania ti leadership fund, ania ti gagemna daytoy ken ania nga ahensia ti nangipatungpal.
Kalikagumna nga ammoen no adda limitasion wenno adda ti pakabuklan a kontrol dagiti senador iti nadakamat a pondo.
Maipalagip a naamoan ti P24 billion leadership fund dagiti senador idi dinakamat ni dati a Department of Public Works and Highways (DPWH) Secretary Manuel Bonoan iti napalabas a Sandiganbayan hearing ket nakalaon iti 2025 budget ti ahensia.
Kas dati a vice chairman ti House Committee on Appropriation ket inpetteng ni Abante nga awan leadership fund-da.
