LAOAG CITY – Inkeddeng dagiti mannalon iti Barangay Bacsil ditoy ciudad ti Laoag nga unas laengen ti imula da gapu iti mapaspasaran a tikag.
Daytoy ket gapu ta saanen nga agtubo dagiti pagay, mais ken nateng.
Naamoan a ti unas ket basbassit ti kasapulan na a danom tapno agbiag isut gapuna a patien dagiti mannalon iti nadakamat a barangay a napinpintas nga isu paylaeng ti imula da.
Segun ken ni Engr. Shiela Opelac, ti City Agriculturist, addan ti 137 nga ektarya dagiti kataltalunan iti dumaya a paset ti ciudad ti apektado ti El Niño Phenomenon.
Nupay kasta, saan nga agsardeng ti panangipaay ti suporta ken tulong ti lokal a gobierno iti ciudad no sadinno nga adda ti naipaay a solar water pump kadagiti maseknan a mannalon.
Inpakaammo ni Opelac a saan unay a naapektaran dagiti kataltalunan iti lauden a paset ti ciudad gapu ta adda ti irigasyon a pagalaan ti danom dagiti mannalon.
