LAOAG CITY – Adda ti agingga alas-7 ti rabii ita nga aldaw ni Vice President Sara Duterte tapno isubmitir ti pormal a sungbatna iti Articles of Impeachment a naipila kontra kenkuana.
Iti naiparuk-at nga abiso ti Senado, inbatad ni Senate Secretary Jose Luis Montales a mabalin nga isubmitir ti Bise Presidente ti sungbatna manipud alas-8 ti bigat agingga alas-7 ti rabii, personal man wenno iti babaen ti email.
Naammoan a kas panagsagsagana iti posible a personal a panagisubmitir ti dokumento, nilimitaran ti Senado ti access iti sumagmamano a paset ti pasdek tapno maliklikan ti riribok ken panaguummong ti media.
Basar iti advisory, dagiti laeng otorisado nga opisial ti impeachment court ken dagiti miembro ti legal team ti Bise Presidente ti mapalubosan a makastrek iti Office of the Senate Secretary iti maikanem a kadsaaran no sadinno nga awaten ken iproseso ti nasao a dokumento.
Inlawlawag ti Senado a kasapulan ti nasao nga addang gapu iti limitado nga espasyo iti uneg ti pasdek ken iti manamnama a panagadu ti media personnel nga ag-cover iti panagisubmitir ti sungbat ni Duterte.
Kabayatanna, naglikudan ni Senate President Alan Peter Cayetano dagiti alegasion nga adda ti pakainaiganna iti impeachment trial ti gakat nga amendaran ti Senate rules mainaig iti remote participation dagiti Senador.
Inpasigurado ti legal team ni Duterte nga agsungbatda para iti naikeddeng a deadline para iti panagisubmitir ti sungbatda iti impeachment complaint.
