LAOAG CITY – Nagsagaba ti sumagmamano a sugat ti maysa a mannalon kalpasan a binagkong ti pada na met laeng a mannalon iti Barangay Santiago iti ili ti Marcos.
Daytoy ti inbatad ni Police Capt. Jonvale Maramag, ti chief of police iti ili ti Marcos.
Binigbig ni Maramag ti biktima a ni Arden Santiago y Bineg, agtawen ti 28, baro, mannalon, taga Barangay Sto. Niño iti ili ti Nueva Era idinto a ti suspek ket ni Jansen Bayudan y Ibao, agtawen ti 29, baro, mannalon ken residente iti Barangay Santiago iti ili ti Marcos.
Inlawlawag ni Maramag a basar iti imbestigasyon da, kabayatan a magmagna nga agawid ti suspek a ket sinada ken maipagarop a kinursunada ti biktima.
Segun ken ni Maramag, inadmitir ti suspek nga adda ti itugtugot na a bassit nga immuko ken gapu iti pungtot na iti panangsada kenkuana ti biktima ket naaramid na ti nangbagkong iti namin-uppat a daras.
Kalpasan a nagbakong ti suspek ti biktima ket inpurwak na ti inusar na nga immuko iti taltalon ken bulon nan ti nagtalapwagaw.
Nupay kasta, inpakaammo ni Maramag nga iti panangiyuswat ti hot pursuit operation dagiti kameng ti pulisya ket boluntaryo met laeng a simmuko ti suspek.
Immuna a naitaray ti biktima iti Doña Josefa Edralin Marcos District Hospital iti met laeng nasao nga ili ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na kalpasan a nagsagaba ti uppat a sugat iti bagina.
Naamoan pay dagiti kameng ti pulisya nga agpada a nakainom ti suspek ken biktima ngem saan da a nagkadwa a naginom.
Inbaga ni Maramag a pilaan da ti reklamo a frustrated homicide ti suspek babaen iti inquest.
Nagtalinaed met ti suspek iti kustodyar ti PNP iti ili ti Marcos.
