LAOAG CITY – Nangipila ni Senador Ronald “Bato” Dela Rosa ti dua a gakat iti baet ti agtultuloy a panag-absent daytoy iti Senado.
Basar iti rekord ti Senado, karaman iti gakat a pinirmaan ni Dela Rosa ket ti Proposed Senate Bill (SB) No. 2080 wenno ti Counter Foreign Interference Act a mangdusa iti pannakibiang ti gangannaet iti pagilian nga inpila idi Lunes kagiddan ti panagsubli iti sesyon kalpasan ti maysa a bulan a recess.
Naipila pay ti Senate Bill No. 2079 wenno ti National Police Clearance System Act a gagem a papigsaen ti operasionalisasion ti sistema pakairamanan ti panagpatalinaed ti centralized record ti amin ti naipadamag a crime incidents, warrants of arrest, dagiti ladawan ken personalized details dagiti inarestar ken wanted persons.
Maipalagip a sipud idi Nobiembre iti napalabas a tawen ket saanen a nagpakpakita iti publiko ni Sen. Dela Rosa ken saan nga agat-atendar iti aniaman a sesyon iti Senado iti baet ti mapagsasaritaan a nangiyisyu ti International Criminal Court (ICC) ti arrest warrant kontra kenkuana mainaig iti kontrobersial a war on drugs.
