LAOAG CITY – Nasugatan ti akinkannawan nga ima ni Police Capt. Kristoffer King Ramos, ti chief of police iti ili ti Piddig kalpasan a rimmaot ti nabartek a mannalon iti mismo a kwerpo ti pulisya iti nasao nga ili.
Iti ekslusibo nga interview ti Bombo Radyo Laoag, inistorya ni Ramos a nakigtot da idi bigla lattan a napan rimmaot iti kwerpo ti pulisya ti suspek a ni Julio Sacramento, agtawen ti 53, mannalon ken residente iti Sitio Lubong, Brgy. Tonoton iti ili ti Piddig.
Inbatad ni Ramos nga intudo isuna ti suspek kagiddan ti panangibaga na ti ” SIKA A HEPE KA, KAYATKO LANG NGA ILAWALAWAG A BINUTBUTENGKO DIAY BAROK NGA DAKKEL TA DOSE MIL A PYANSA NA NO MADI AGTALNA! NO MADIKA MAKAAWAT SIKA A HEPE, KEN DAKAYO A PUPULIS NGA AWAN SERSERBINA PUMANAW KAYO PIDDIG!
Kuna ni Ramos a kalpasan a naibaga daytoy ti suspek ket maipagarop a dinarop na ni Ramos tapno dangran na ngem naisarapa na ti akinkannawan nga ima na rason a nasugatan.
Kalpasan iti daytoy ket intultuloy ti suspek ti nagwala ket nabuong na ti cover glass ti lamisaan iti uneg ti kwerpo ti pulisya.
Gapu iti daytoy, inbilin ni Ramos kadagiti kakadwa na nga arestaren da ni Sacramento.
Rumrumuar a sakbay a napan rimmaot ti suspek iti kwerpo ti pulisya ket adda ti panagriri da iti anak na kalpasan nasita ti ub-ubing a Sacramento babaen kadagiti opisyal ti barangay iti Barangay Tonoton iti ili ti Piddig.
Patien pay ni Ramos a mabalin a masikuranen ti suspek kalpasan a saanen a makapaspasyar gapu iti maipatpatungpal nga Enhanced Community Quarantine (ECQ).
Inpakaammo ni Ramos a gapu iti inaramid ni Sacramento ket pilaan da ti agsusukot a reklamo kas ti malicious mischief, Direct Assault Upon An Agent of Person in Authority, Republic Act (RA) 11332, Section 9 mainaig iti maipatpatungpal nga ECQ.
Kabayatanna, inbatad ni Ramos nga apaman a nausawaan ni Sacramento ket nagpakawan kadakuada ngem ituloy na latta a pilaan ti reklamo gapu iti saan a maiparbeng nga inaramid ti suspek.
