LAOAG CITY – Inaprobaranen ti Department of Budget and Management (DBM) ti ₱2,000 a nayon iti honoraria dagiti manursuro ken dadduma pay a poll workers nga agserbi para iti 2025 Midterm Elections inton Lunes.
Inbatad ni Budget Secretary Amenah Pangandaman, maiyallubog daytoy iti pammilin mismo ni Presidente Ferdinand R. Marcos Jr. nangruna ket ammo ti gobierno ti rigat dagiti manursuro ken dadduma pay a makumikom tunggal eleksion.
Naammoan a gapu iti nayon a ₱2,000, adda ti ₱12,OOO a baro nga honoraria rates para iti chairperson ti electoral board idinto a ₱11,000 met iti poll clerk ken 3rd member ken ₱8,OOO a manipud iti dati a ₱6,OOO ti maawat ti support staff.
Inallukoy ni Pangandaman ti Commission on Elections (Comelec) ken dadduma pay nga ahensia ti gobierno a siguradoen a maawat nga insigida dagiti manursuro ken dadduma pay a poll workers ti benepisio dagitoy.
