LAOAG CITY – Nakikaysa ti Marcos Hall of Justice ditoy probinsya kadagiti nangkondenar iti pannakapapatay kalpasan a napaltogan ni Judge Ma. Theresa Abadilla iti Manila Regional Trial Court (RTC) Branch 45.
Inpadanon met ni Atty. Savier Gacho, clerk of court iti Marcos Hall of Justice ti pannakipagladingit da iti pannakatay ti nasao nga huwes.
Mainaig iti daytoy, inpasigurado ni Gacho a saan a mapasamak iti Marcos Hall of Justice iti napasamak kenni Judge Abadilla a puon ti nakatayan na.
Segun kenni Gacho, pinaigetan da pay ti seguridad ti nasao a pasdek no sadinno ket maymaysa laeng ti pagserkan ken pagruwaran tapno masigurado a natalged dagiti abogado ken empleado.
Maipalagip a pimmusay ni Judge Abadilla idi kalman kalpasan a pinaltogan a mismo ni Atty. Amador Rebato, ti clerk of court ken kalpasan ket pinaltogan na met ti bagbagi na.
Kabayatanna, ikarkarigatan ti Bombo Radyo ti mangala ti rekasyon wenno komento manipud iti kapamilya ni Judge Abadilla seknan iti nasao a pasamak.
