LAOAG CITY – Nagpanawagan ni Parañaque 2nd District Rep. Brian Yamsuan nga aramiden a regular ti inspeksion ken maintenance kadagiti infrastructure project ti gobierno tapno masigurado nga agtaltalinaed a natalged ken de-kalidad dagitoy.
Iti House Bill 9780, insingasing ni Rep. Yamsuan a mangiwayat ti Department of Public Works and Highways (DPWH) ti inspeksion iti kada 5 agingga 10 a tawen kalpasan a nakumpleto ti maysa a proyekto.
Inbatad ni Yamsuan a napateg ti regular a physical inspection gapu ta mabalin a maapektaran ti kinatibker dagiti proyekto ti panawen, sobra a karga ken dadduma pay.
Gagem ti gakat a masolbar ti problema kadagiti daan a proyekto a saan a mamenmentenargapu kadagiti maipapan kadagiti agtagikua ti daga.
Inbilinna kadagiti agtagikua wenno legal nga agus-usar ti lugar a palubosan ti gobierno a mangiwayat ti inspeksion, maintenance, panagtarimaan wenno rehabilitation.
Ti asinoman a kumontra wenno saan a nainkalintegan nga agkedked iti access para kadagitoy nga aramid ket mabalin a mamulta ti agingga P50,000.
Kuna ni Yamsuan a gagem ti gakat a maprotektaran ti binilyon a pisos a pundo ti gobierno ken masigurado a pakabenepisiaran ti nabayag dagiti proyekto ti gobierno.
