LAOAG CITY – Inlungalong ni Las Piñas Rep. Camille Villar ti maysa a gakat a gagem a maipaayan ti maternity kits dagiti marigrigat a masikog tapno maipasigurado ti kalidad prenatal care dagitoy.
Iti House Bill No. 10694, inbatad ni Villar ti datos ti United Nations Population Fund (UNFPA) a dumanon iti 2,478 a masikog ti pimmusay ditoy Pilipinas idi 2021 gapu iti panagpasngay ken pregnancy-related complications.
Iti nasao nga United Nations Population Fund report ket 14 a porsiento kadagiti masikog ti awan ti maaw-awatda a medical care pakairamanan ditoy ti regular checkups idinto a maysa kadagiti 10 a masikog ti awan ti maaw-awatda a tulong manipud kadagiti skilled healthcare personnel iti panagpasngayda.
Iti ilunglungalong ni Villar, ti maternity kit ket nasken nga adda ti ules, diaper, gauzes, towels, nappies, bedding ken child care products.
Naammoan a ti maternity kit ket libre ken ipaay kadagiti masikog a tingitingen ti Standardized Targeting System wenno Pantawid Pamilyang Pilipino Program (4Ps) Act.
Iti babaen ti gakat, ti Department of Social Welfare and Development (DSWD) ti mangidaulo iti pannakaipatungpal ti programa.
