LAOAG CITY – Nadismaya ni Ukrainian President Volodymyr Zelensky ti agsasaruno a panagbisita dagiti envoy ti Estados Unidos iti Moscow a saan man laeng a bimmisita iti Kyiv a maysa a panangipakita ti saan a panangrespetar iti baet ti agtultuloy a gubat iti Ukraine.
Inbatad ni Zelensky a nupay maawatanna dagiti logistical challenges, saan a mailinged a ti panagbisita da Steve Witkoff ken Jared Kushner iti Russia a saan a bumisbisita iti Ukraine ket mangipakpakita ti kinakurang iti panangrespetar.
Ni Witkoff nga special envoy ni United States President Donald Trump ket sumagmamano a daras a nakitaripnong ken ni Russian President Vladimir Putin iti Moscow.
Naammoan nga uray kaano ket saan pay pulos a bimmisita dagiti opisial iti Kyiv.
Immunan nga inpakaammo ni Zelensky nga adda ti plano a bumisita iti Ukraine ti dua nga opisial ita nga Abril ngem saan daytoy a natuloy gapu iti pannakaiyakar ti atension ti Amerika iti kumarkaro a tension iti Middle East partikular iti rinnupak ti Estados Unidos ken Israel kontra iti Iran.
Iti baet daytoy, inpetteng ni Zelensky ti kinapateg ti agtultuloy a kooperasion iti Estados Unidos.
