LAOAG CITY – Natay kalpasan a napaltopaltogan ni Mayor Arsenio Agustin ken ti driver ti backhoe bayat nga adda da iti paset ti Brgy. Mabuti ti ili a Marcos.
Segun kenni Senior Inspector Joseph Calderon, Chief of Police ti PNP Marcos, dagus a nangiyuswat ti drag net operation dagiti nagduduma a kuerpo ti pulisya tapno matiliw ti saan pay a nabigbig a suspek.
Naitaray iti kaasitgan nga ospital ni Mayor Agustin ngem naideklara a dead on arrival daytoy.
Ti inisyal nga impormasyon ti PNP-Marcos, nagtaray dagiti suspek iti kabanbantayan a paset ti nasao a barangay kalpasan ti insidente.
Naamoan a nagturong ni Mayor Agustin iti Brgy. Mabuti tapno mangiyuswat ti inspection iti proyekto a dam idi pinalto-paltogan ida ti saan pay a nabigbig a suspek.
Agtultuloy met ti imbestigasyon dagiti otoridad seknan ti krimen.
