LAOAG CITY – Inlawlawag ni Mayor Cresente Garcia iti ili ti Burgos ti 10 a milyon a pisos a kiniddaw na iti 1st district congressional office.
Daytoy ket kalpasan a kwinestyunaran iti konseho iti nadakamat nga ili no apay nga addan ti kantidad a kiniddaw ti mayor idinto nga awan pay ti disenyo ti multi-purpose building a plano a pakailatangan ti nasao a pondo.
Segun iti mayor, awan pay ti disenyo ti proyekto gapu ta saanna a masigurado no maaprubaran amin ti kiniddaw na a pondo wenno saan.
Innayon na a ti nasao a proyekto ket para kadagiti mannalon iti nasao nga ili tapnu adda ti pagyananda nu adda dagiti taripnong da.
Kabayatanna, inbatad ti konseho a masapol nga adda ti disenyo a maipakita nga umuna kadakuada sakbay a suportaran da ti kalikagom ti mayor.
