LAOAG CITY – Naarestar ti mayor iti Istanbul idiay Turkey kas paset ti imbestigasyon iti alegasyon a panagkunniber kontra kenkuana.
Napasamak daytoy sumagmamano nga aldaw sakbay iti pannakapili na koma kas presidential candidate.
Ni Ekrem Imamoglu manipod iti Republican People’s Party (CHP) ket maysa kadagiti makitkita a napinget nga agbalin a kalaban ni Turkish President Recep Tayip Erdogan.
Inbatad dagiti prosecutors a maak-akusaran ni Imamoglu kas “criminal organization leader suspect”.
Malaksid ken ni Imamoglu ket adda pay ti ginasut a suspek a pakairamanan ti sumagmamano a pulitiko, journalist ken negosyante ti nabalud kas paset iti imbestigasyon.
Inpetteng met ni Imamoglu a ti kalikagom dagiti tattao ket saan pulos a mapagulimek ken inkari na nga ilaban na ti karbengan na.
Immuna iti daytoy, dinosdosena a police officers ti napan nangraot iti balay ni Imamoglu a masarakan iti maibilang kas historic Turkish city.
Inawagan pay ni Imamoglu ti pannakaarestar na kas “legally baseless”, kagiddan ti panangipetteng na a masapol a dagiti universities ket agtalinaed nga independent, saan a makibiang iti pulitika ken nakatutuk iti ammo da a pagsayaatan ti kaadoan.
Maipalagip a saan a daytoy ti damo a naarestar ni Imamoglu gapu ta idi 2022 ket nasentensyaan a mabalud iti dua a tawen ken innem a bolan gapu iti pananginsulto na kadagiti sumagmamano nga opisyal bayat iti panagbitla na.
