LAOAG CITY – Agtultuloy a maag-agasan iti Governor Roque Ablan Senior Memorial Hospital (GRASMH) ditoy ciudad ti Laoag ti biktima ti napasamak a pammagkong iti Sitio Caburtungan, Barangay Pacifico iti ili ti Marcos.
Nabigbig ti biktima a ni Mark Ugali, agtawen ti 25, baro, mannalon idinto a ti suspek ket ti step-father na a ni Fernando Saludes, agtawen ti 46, addaan ti live-in partner, mannalon, agpada dagitoy a residente iti nadakamat a barangay.
Inbatad ni Police Major Christian Felix, ti chief of police iti ili ti Marcos, basar iti imbestigasyon da ket nabartek a nagawid ni Saludes ken nariri da iti live-in partner na a ni Marites Ugali, agtawen ti 50 gapu ta agimon ti nasao a suspek.
Kuna na a kabayatan ti panagriri dagiti aglive-in partner ket naganawa ti biktima ngem ditoy metten a binagkong ti suspek ti akin-kannigid a paset ti barukong na babaen ti iggem na a kutsilyo.
Naitaray a dagus iti GRASMH ti biktima para iti pannakataming na idinto a natiliw met ti suspek nga iti agdama ket isagsaganan ti PNP ti ipila da a maiyannatop a reklamo kontra kenkuana.
