LAOAG CITY – Natay ti maysa a baro kalpasan ti pannakadesgrasya na iti Barangay Catuguing iti ili ti San Nicolas.
Binigbig ni Police Major Eduardo Santos, ti chief of police ti Philippine National Police iti nasao nga ili ti biktima a ni Kevin Balais, agtawen ti 18 ken residente iti Barangay 6, San Nicolas, Ilocos Norte.
Segun kenni Santos, adda iti asideg ti convenience store ti biktima idi nakita na ti maysa kadagiti kaam-ammo na a mapan agitulod ken kayat na ti sumurot.
Inbatad ni Santos a linapdan daytoy ti kadua na ngem pinataray ti biktima ken rumrumuar a nagovertake agingga a napukawan ti kontrol.
Gapo iti daytoy, naidungpar ti biktima iti puon ti kayo ken naregreg iti kanal rason a nasugatan ti nagduduma a paset ti bagi ken ulo daytoy.
Naitaray iti biktima iti ospital ngem naideklara a dead on arrival.
