LAOAG CITY – Natiliw ti dua a lalaki a nakalugan iti maysa a motorsiklo nga NMAX iti naiyuswat nga Anti-Illegal Drugs Transport Operation iti paset ti Barangay 23, San Matias ditoy ciudad ti Laoag.
Nabigbig dagiti natiliw nga isuda Jaylord Pailma, agtawen ti 23, residente iti Brgy. 1 iti ili ti Vintar ken ti akinkukua iti motorsiklo nga NMAX a ni Jeric Ramones, agtawen ti 26 ken residente iti Brgy.3 iti ili ti Vinta.
Naamoan a dagiti dua ket aggapo da iti ili ti Vintar ken agturong da koma iti sentro ditoy ciudad ti Laoag idi natiliw da babaen iti naiyuswat a checkpoint iti Brgy. 23 ditoy ciudad.
Iti panagsukimat dagiti otoridad iti karga dagiti Pailma ken Ramones ket ditoy a nakita da ti maysa a brick a napagango a bulong ti marijuana a naikabil iti kahon ti sapatos.
Inpetteng da Pailma ken Ramones a saanda a kukua ti naala kadakuada nga ebidensya.
Mainaig iti daytoy, inbatad ni Police Lt. Col. Joseph Baltazar, ti chief of police ditoy ciudad ti Laoag a nangestablisar da ti checkpoint kalpasan nga adda ti naawat da nga impormasyon nga agibiyahe dagiti dua ti illegal a droga.
Segun kenkuana,addan ti rekord ni Pailma gapu ta idi Mayo 2021 ket natiliw gapu iti illegal a droga idinto a ni Ramones ket awan ti rekord na ngem karamanen gaputa kadwa na daytoy ken isuna ti akibagi ti motorsiklo a nagluganan da.
Kuna ni Baltazar nga imbestigaren da no adda pay ti sabali a probinsya a pagop-operaran da malaksid ditoy Ilocos Norte.
Kabayatanna, inpalgak ti chief of police nga amin a matiltiliw ket agpapada ti ibagbaga a saanda a bagi dagiti natiliw kadakuada nga ebidensya.
Sungbat na daytoy iti naibaga da Pailma ken Ramones a saan da a bagi ti nakumpiskar kadakuada a napagango a bulong ti marijuana.
