LAOAG CITY – Natay ti maysa a lakay kalpasan a nadungpar ti maysa a motorsiklo iti paset ti Rizal Street iti Brgy. 25 ditoy Siudad ti Laoag.
Binigbig ni Police Corporal Alexson Rosal, iti PNP Laoag Traffic Division ti driver ti motorsiklo nga Honda TMX 125 nga agmaris ti nalabbaga nga agtawen ti 37, naasawaan ken residente iti Brgy. Sta. Ana iti ili ti Solsona idinto a ti biktima ket agtawen ti 76 ken residente ti Brgy. 23 ditoy siudad ti Laoag.
Segun ken ni Rosal, bayat nga agpapalaud a direksion ti motorsiklo ket dita a kellaat a bimmalsiw ti lakay nga agturong nga iti abagan a direksion.
Gapu iti daytoy, nadungpar ti lakay ken naitupa ti ulo na.
Dagus a naitaray daytoy iti Governor Roque Ablan Senior Memorial Hospital (GRASMH) ditoy siudad ti Laoag ngem pimmusay bayat a matamtaming.
Kabayatanna, saan met a naan-ano ti nangiturong iti motorsiklo a naamoan a mapan kuma agubra idi napasamak ti insidente.
Mainaig iti daytoy, inpakaamo ni Rosal a nagsasarita metten dagiti agsinnungbangir a partido ngem saan pay a nalawag no ania ti sumaruno nga addang ti pamilya ti biktima.
