LAOAG CITY – Naarestar ti maysa a lalaki kalpasan a sinerrek na ti maysa a tianggi partikular ti Noel Carinugan Store a kukua ni Irene Carinugan y Padayao, agtawen ti 66, balo ken residente iti Brgy. 15, Suba iti ili ti Paoay.
Basar iti Philippine National Police, inreport kadakuada ni Carinugan a mapukpukaw ti kwarta iti tianggi da nga agdagop ti 62, 500 a pisos.
Inbatad ti biktima nga iti panangrebisar ti anakna a lalaki iti CCTV wenno closed-circuit television camera iti tianggi da ket nabigbig ti suspek a ni Christopher Bale y Padayao, agtawen ti 37, awanan ti asawa ken residente metlaeng iti nadakamat a barangay.
Naamoan nga iti dayta metlaeng nga aldaw ket naarestar dagiti otoridad ti suspek iti pagtaengan na ken inpakaammo na a dagiti tinakaw na a kwarta ket inkabil na iti plastic container nga inlemmeng na iti maysa pay a pagnanaedan na iti Brgy Samac iti ili ti San Nicolas.
Iti agdama nagtalinaed ti suspek iti Philippine National Police ken maisagsaganan ti maiyannatop a kaso a maipila kontra kenkuana.
