LAOAG CITY – Natay ti maysa a lalaki kalpasan a nagbekkel usar ti tali iti likodan ti family house ti live in partner na iti Barangay Susugaen iti ili ti Pasuquin.
Binigbig ni Police Lt. Jimmy Aganon, deputy chief of police ti PNP-Pasuquin ti biktima a ni Felix Roel Bogaisan Pascua, agtawen ti 48, maysa a mannalon ken residente iti Barangay Poblacion 2 iti nasao nga ili.
Segun kenni Aganon, nakita ti ama ti live in partner na a nakabitin ti biktima iti maysa a puon ti kayo ngem naglabasen ti tallo agingga iti uppat nga oras sakbay a nadiskubre.
Kunana nga idi napan dagiti otoridad iti nakapasamakan ti insidente ket nadanunan da a nakapatintumeng ken nakabitin pay laeng.
Inlawlawag na a ti biktima ket napan laeng iti Barangay Susugaen gapo ta mapan na sukunen ti live in partner na ken gapo ta nabartek daytoy ket nagkedked ti babai nga agawid iti Barangay Poblacion.
Ummuna iti daytoy, kunana nga idi malem kalman ket nasada da daytoy iti checkpoint ken nadlaw da a nakainom ngem kabaelan na pay laeng ti bagi na ken binagbagaan da daytoy ken pinagawid da ngem nagsubli gapo ta sukunen na ti live in partner na.
Inbatad na a rumrumwar iti imbestigasyon da ti maipagarop a rason ti panagpakamatay ti biktima ket piliten na ti live in partner na nga agawid iti Barangay Poblacion idi rabii ngem nagkedked ti babai ken maipagarop nga adda ti personal a problema da.
Kunana nga iti panagdamdamag da kadagiti tattao iti nadakamat a barangay ken ti residensya ti biktima ket awan met ti nakariri na iti kallabes.
Mainaig iti daytoy, kuna ni Aganon nga awan ti nakita dagiti pulis a foul play iti napasamak ngem agtultuloy latta ti imbestigasyon da mainaig iti daytoy.
Kabayatanna, nagpanawagan ni Aganon kadagiti kailyan na a patibkeren ti pakinakem da no adda ti problema da wenno mapan da iti pagtalkan da a tao tapno matulungan dagitoy.
