LAOAG CITY – Pimmusay ti maysa a lalaki kalpasan a napaltu-paltugan iti paset ti Brgy. 23 ditoy siudad ti Laoag.
Nabigbig ti biktima a ni Albert Balbas, agtawen ti 59 ken residente iti nasao a barangay.
Basar iti report manipod iti Philippine National Police ditoy siudad ti Laoag, agarup 1:15 itay parbangon ket ti biktima ket adda iti ruar ti pagtaengan da tapno agpaisbo ti taraken na nga aso.
Kabayatanna, nakanggeg ti anak ti biktima ti nagpukaw iti dakes a sarita ken dita a napan met innala ti ama na ti igam daytoy ken naglugan iti motorsiklo na.
Nu pay kasta, apaman a nakadayo ti biktima iti sumagmamano a metro manipod iti pagtaengan da ket nagserdeng ken dita a nangngeg ti anak na ti tallo a putok ti paltog agingga a nadasay ti ama na.
Nakita met ti anak ti biktima ti suspek a nagtartaray ken naglugan iti black Toyota Fortuner nu sadino a tugot pay daytoy ti paltog a nausar iti krimen.
Dagus a naitaray ti biktima iti Governor Roque Ablan Sr. Memorial Hospital ditoy siudad ti Laoag ngem pimmusay gapu ti tama ti paltog iti muging na.
Kabayatanna, nakita iti nakapasamakan ti insidente ti rehistrado a Cal. 45 a paltog ti biktima ken addaan ti dua a magazine.
Kabayatanna, inrakurak ni Mr. Mike Garcia, karruba ni Blabas, naklaat idi adda ti mangngeg na a putok ti paltog sumagmamano a minutos kalpasan a naggapo da iti simbaan.
Inbatad na nga apaman a kinita na iti ruar ti balay da ket dita a nakita na ti nakadasay a ni Balbas.
Inpakaammo na a ti service vehicle a nakaparking iti sango ti balay da ket nairamraman a natamaan ti bala ti paltog partikular iti likod a paset daytoy.
Immuna iti daytoy, kuna ni Garcia nga awan ti ammo na a dakes a damag maipanggep ken ni Balbas wenno nakariri daytoy gapu ta nasaayat a karruba kadakuana.
Kabayatanna, rumrumuar a dati a riri ti makitkita a motibo dagiti otoridad iti napasamak a pammaltog.
Iti agdama ket agtultuloy ti panangbirok dagiti otoridad iti nakalibas a suspek.
