LAOAG CITY – Natiliw ti maysa a lalaki gapo iti panaglabsing na iti Rule V iti Sec 31 ti RA 10591 ken Falsification of Document iti Brgy. Pasaleng Pagudpud, Ilocos Norte.
Nabigbig ti suspek a ni Nixon Alipio y Sabado, agtawen ti 43, awanan ti asawa, driver, tubo iti Brgy Santor, Sanchez Mira, Cagayan ken agturong iti 73 19th Ave., Murphy San Roque, Quezon City.
Segun kenni Police Lt. BJhay Calivoso, ti deputy chief of police ti PNP-Pagudpud, idi inpakita ni Alipio ti medical certificate na ket nagatap da a peke daytoy isut gapo na a tinawagan da ti clinic a nakaipan iti dokumento nga inpresentar ken ditoy a naduktalan da nga awan ti in-isssue ti klinika.
Inlawlawag na dinamag na iti suspek no adda ti paltog na ken inadmitir ti maseknan ken inpakita na dagiti dokumento ngem awan ti Permit to Carry Firearm Outside Residence daytoy.
Naamoan a ti paltog ket Cal. 9mm pistol nga addaan ti serial no. A TAV37401 ken ti expiry date na ket March 15, 2022 ken addaan ti dua a magazines nga addaan ti karga a 14 a bala ken saan a nakaipakita ti PTCFOR.
Inbatad na a nakikoordenar da metten iti pulisya iti Sanchez Mira tapno maimbestigar ti katatao ti maseknan.
Iti agdama ket adda iti kustudiyar ti PNP-Pagudpud ti nasao a suspek ken maisagsaganan ti kaso a maipila kontra kenkuana.
Innayon na nga ur-urayen da ti sertipikasyon manipud iti clinic tapno nayun iti dokumento gapo ta no awan pay ket mabalin nga ibasura ti piskalya ditoy ciudad ti Laoag ti kaso.
