LAOAG CITY – Inpakaammo ni PMaj. Eduardo Santos, hepe ti PNP iti ili ti San Nicolas a maysa a lalaki ti nagsagaba ti sugat kalpasan a natamaan ti bala ti paltog iti Brgy. 2 iti nasao nga ili.
Kuna ni Santos a basar iti inisyal nga imbestigasyon da, naggapo iti sentro ti ili ti biktima a maysa a mekaniko, agtawen ti 27 ken residente iti Brgy. 15 iti nasao nga ili.
Inbatad na nga apaman a nakadanon iti paset ti Brgy. 2 ket dita a pinayapayan ti suspek nga am-ammo na met laeng rason a nagsardeng.
Nu pay kasta, inpakaammo na nga apaman nga immasideg ti biktima a nakalugan iti motorsiklo iti compound ti suspek ket dita a kellaat a nagpaputok ti paltog iti namindua a daras ken natamaan ti luppo daytoy.
Kuna ni Santos a kalpasan ti napasamak ket dagus a nagtalimpuagaw ti suspek ken saan pay a masinunuo ti rason iti panangdangran na iti biktima.
Mainaig iti daytoy, inpakaammo na a narekobre iti nakapasamakan ti insidente ti dua nga empty shell ti calibre 45 a paltog.
Kabayatanna, inbatad ti hepe nga agtultuloy ti naun-uneg nga imbestigayson iti nasao nga insidente pakairamanan ti pannakabirok ti suspek.
Innayun na nga addan ti pannakaikoordenar da iti kadagiti opisyal iti Brgy. 2 ken naala dagiti CCTV footage a mabalin a makadeterminar ti pudno a napasamak.
