LAOAG CITY – Nasakit ti nakem ni Mrs. Lanie Bumanglag iti Barangay 14 iti ili ti San Nicolas iti maipagarop a madi a panagsasao kenkuana ti napan nagsingir ti bills da iti kuryente.
Segun kenni Bumanglag, itay bigat ket adda ti napan iti pagtaengan da nga agsingir iti bill da ti kuryente ken inbaon na iti pwesto ti anak na gapo ta isu ti agbayad.
Nupay kasta, kunana a kalpasan ti sumagmamano a minutos ket nagsubli ti maseknan nga agsingir ken ditoyen a maipagarop a pimmigsa ti boses na gapo ta awan ti nadanon na a tao iti madakdakamat a pwesto ti anak na.
Inbatad na a ditoy metten a maipagarop nga inbaga ti agsingir a putden na laengen ti linya ti kuryente da Bumanglag nangruna ket saan na met nga inbaga a saan nga agbayad.
Ummuna iti daytoy, inbaga ni Bumanglag iti apoko na a no matmaturog ti anak na ket saan da a ririingen ken ditoy metten a maipagarop a nakapungtot ti agsingir ken kunana a masapol a mariing daytoy tapno maamoan na ti mapaspasamak.
Gapo iti daytoy, kunana nga inbaga na iti agsingir a tanangen na ti panagsasao na ken saan nga diskumpiyado.
Naamoan nga ita ti deadline iti panagbayad da ti bill da ti kuryente ngem inpetteng na a nawaya met pay laeng agingga intono malem para iti panagbayad da ngem pinutol latta ti maseknan ti linya ti kuryente da.
Kalpasan ti pannakaputed ti linya ti kuryente ken ti saan da a panagkinnawatan iti agsingir, kunana nga agtegtegerger nangruna ket adda ti sakit na iti puso.
Mainaig iti daytoy, kunana a ti saan na a kayat iti napasamak ket ti panagsarsarita ti agsingir ti bill ti kuryente.
