LAOAG CITY – Sinerrek ti agtatakaw ti maysa a pagtaengan iti Barangay Madamba iti ili ti Dingras.
Segun ken ni Ms. Janet Omay, biktima iti panagtatakaw, binigbigna ti suspek a ni Erning Fariñas a mismo a karrubada.
Inbatadna nga agarup 10:30 ti rabii ket adda ti nagkatok iti ridaw ti pagtaenganda ngem matmaturog isuna kadayta a gundaway.
Nupay kasta, inbatadna a gapu ta manarimaan nga agar-aramid ti assignment ti anakna ket isu ti napan nanglukat ti ridaw.
Mainaig iti daytoy, inpalgakna a nagdirdiretso ti suspek iti kuartoda nga insigidana nga innala ti dua a selpon a nakaparabaw iti kamada.
Gapu iti daytoy, inpalgakna a napanna sinidir ti suspek tapno alaen dagiti selponda ngem imbes nga agpakawan ket tinungpa ken binnekkelna pay isuna.
Innayonna a desidido isuna a mangipila ti reklamo kontra iti suspek tapno maikkan ti pagmenna-mennaanna.
Kabayatanna, naammoan a naisubli met laeng dagiti dua a selpon nga intaray ti suspek.
