LAOAG CITY – Positibo ti naiyuswat a Search warrant operation iti Sitio Matanubong, Barangay Quiom iti ciudad ti Batac partikular iti pagtaengan ti maysa a construction worker.
Nailanad iti search warrant a biruken dagiti otoridad ket ti maipagarop a marijuana.
Nabigbig ti subject ti operasyon a ni Edmund Mamotos, agtawen ti 39, addaan ti live in partner, maysa a construction worker ken residente iti nasao a barangay.
Nabirukan dagiti otoridad ti maysa a calibre 22 rovolver nga awan ti bala na ken maysa a nangisit nga eco bag a naglaon ti lima a sachet ti maipagarop a napagango a bulong marijuana pakairamanan ti tangkay na.
Inbatad met ni Barangay Chairman Romeo Campilla nga awan met ti rekord ni Mamotos, saan a drug surenderee ken awan ti nakairamramanan na nga iligal nga aktibidad.
Kunana nga idi naamoan na a maiyuswatan ti search warrant operation ni Mamotos ket nakigtot gapo ta saan na a ninamnama daytoy.
Mainaig iti daytoy, kalikagom ni Mr. Estanislao Mamotos, ti ama ti subject a malawlawagan nga adda ti maipagarop nga ummuna a simrek iti pagtaengan da sakbay a pormal a naiyuswat ti operasyon.
Inpetteng na a kalpasan a nagluto ket saan na nga in-off ti silaw iti kusina da ken idiadda iti salas ket ado dagiti simrek ken maipagarop nga ineddep dagiti otoridad ti silaw.
Inlawlawag na a saan nga agnanaed iti nasao a pagtaengan gapo ta agtrabtrabaho daytoy.
Kabayatanna, ni Mamotos ket maibilang a Regional Highly Individual iti Police Regional Office 1 ken idi pay napalabas a tawen a sipsiputan dagiti otoridad daytoy.
