LAOAG CITY – Nagkamang iti pulisya ditoy ciudad ti Laoag ni Police Senior Master Sergeant Christopher Tungpalan y Aninag, agtawen ti 44, naasawaan, residente iti Barangay Gabu Sur ditoy ciudad ken kameng ti PNP-Piddig.
Daytoy ket gapo ti maipagarop a saan a panagbayad ni Police Senior Master Sergeant Frederick Bolusan y Cariaga residente iti Barangay Nagsanga iti ili ti Pasuquin ti inutang na a kawarta kenni Tungpalan.
Segun kenni Tungpalan, idi Oktubre 2017 bayat a nakabase da iti Provincial Incidence Response Management 911 ken bimmulod ni Bolusan ti 50 a ribo a pisos ngem ti sungbat na ket awan ti kwarta na.
Gapo iti daytoy, adda ti inyendorsar ni Bolusan a pagbuladan da ken ni Tungpalan ti immutang iti daytoy ngem ti kwarta a nabulod da ket inpautang na met laeng kenni Bolusan.
Naamoan a nagkari ni Bolusan a bayadan na daytoy iti uneg ti 10 a bulan ngem apaman a madanon ti panagbayad na ket immutang manen ti 50 a ribo a pisos.
Nupay kasta, agpapan ita ket saan pay a nabayadan ni Bolusan ti utang na kenni Tungpalan ken maipagarop a saan na nga ikankano daytoy no agsingir.
Kabayatanna, nakasagana met a mangipila ti reklamo ni Tungpalan kontra kenni Bolusan no saan pay laeng nga agbayad.
