LAOAG CITY – Bimtak ti maysa a Tesla Cybertruck a napno ti gasolina ken eksplosibo iti sango ti Trump Hotel idiay Las Vegas, Nevada, a nakatayan ti driver ken nasugatan ti pito nga indibidual.
Narentaan ti nadakamat a lugan manipud Colorado ken simmangpet iti siudad sumagmamano nga oras iti panagbettak na.
Naiparada ti cybertruck iti asideg ti pagserkan ti hotel sakbay a nagasuk ken bimtak a nangiruar kadagiti paputok a nagtayab iti nagduduma a direksion.
Im-imbestigaran dagiti otoridad no adda ti pakanaigan ti insidente iti napasamak a panangdarusdos ti pick-up truck kadagiti tattao idiay New Orleans a nakatayan ti 15 a tattao.
Nupay kasta, inpasigurado ti Federal Bureau of Investigation natalged ti lugar kalpasan ti napasamak nga insidente.
