LAOAG CITY – Nagreklamo ditoy Bombo Radyo Laoag ni Ms. Sarah Castro iti Barangay Quiling Sur iti ciudad ti Batac kontra iti maysa a tianggi iti nasao a lugar.
Daytoy ket gapu iti maipagarop a panaglablabsing ti agtagikua ti tianggi iti curfew hours ken liquor ban.
Inlawlawag na a nabayagen a kastoy ti ar-aramiden ti maseknan no sadinno nga uray idi immuna a naipatungpal ti Enhanced Community Quarantine (ECQ) iti intero a pagilyan ket saan pulos a sumursurot ti maseknan kadagiti maipatpatungpal nga health protocols.
Inbaga na nga inyuman dan daytoy a banag ken ni Barangay Chairman Jerry Imbat iti Barangay Quiling Sur iti ciudad ti Batac ngem ti sungbat kenkuana ti kapitan ket kanayun da a bagbagan ti maseknan.
Innayon na nga arigna awan ti aksyon dagiti opisyal ti barangay kangrunaan na ti kapitan iti reklamo na kontra iti nasao a tianggi.
Kabayatanna, inkalintegan ti kapitan nga ak-aksyunan da ti reklamo ni Castro no sadinno nga adda pay dagiti barangay tanud da a pagbanbantayen na iti nasao a tianggi.
Nupay kasta, inbaga na a mabalin nga adda ti komunikasyon dagiti mapan aggatang ken ti agtagikua ti tianggi babaen iti text gapu ta no adda dagiti nakabantay a tanud ket awan ti mapan gumatang.
Innayon na a no makapanawen dagiti tanud ket maipagarop nga isu metten ti papan dagiti aggatang iti nasao a tianggi.
Kinumpirmaran pay ni Kapitan Imbat a nabayagen nga adda ti saan a panagkinaawatan ti nagreklamo ken ti agtagikua ti tianggi iti barangay da.
Inkari ti kapitan a trataren da a naimbag daytoy nga isyu.
Mainaig iti daytoy, inpetteng ni Castro nga awan ti pakainaigan ti nabayagen a susik da iti agtagikua ti tianggi iti panagreklamo na no di ket itaktakderan na laeng ti sibubukel a kabarangayan na kangrunaan na dagiti dadduma nga store owners a sumursurot kadagiti health safety protocols.
