LAOAG CITY – Inbatad ni Police Major Ramil Llaneras, ti chief of police iti ili ti Bangui nga addan iti natalged a kasasaad ti driver ti nagbaliktad nga 18-wheeler truck iti paset ti Barangay Baruyen iti nasao nga ili.
Inlawlawag na nga agpapa-amyanan ti trailer truck a nagkarga ti sinaksako nga abono ken idi madanun na ti agkurba a paset ti kalsada iti nadakamat a barangay ket napukawan ti preno ti driver.
Gapu iti daytoy, nagdirdiretso ti trailer truck iti asideg ti viewdeck no sadinno a gapu ta saanen a makontrol ti driver ket nagresulta ti panagbaliktad na.
Inpakaammo ti opisyal nga adda ti naapyawan ti trailer truck a tricycle ngem saan a dakkel ti perdisyon na ken saan a naan-ano dagiti nakalugan.
Innayon na a ti driver ket naipit ti saka na iti uneg ti cabin ti trailer truck ken apaman a naiyaon da babaen ti panagtitinnulong ti Municipal Disaster Risk Reduction and Management Council, Bureau of Fire Protection ken Philippine National Police ket intaray da a dagus iti ospital no sadinno nga agpapan ita ket manarimaan paylaeng nga agpapaimbag.
