LAOAG CITY – Inbatad ni Police Major Paul Benedict Parado, ti chief of police iti San Nicolas, Ilocos Norte nga agtultuloy iti naiget nga imbestigasyon da mainaig iti pannakapaltog a poon ti nakatayan ni Cleto Reparejo iti paset ti Barangay 16 iti nasao nga ili.
Inlawlawag na a masapol a kitaen da amin a mabalin nga anggulo iti napasamak a krimen.
Segun ken ni Parado, iti inisyal nga imbestigasyon da ket awan ti madi a rekord ti biktima iti nasao a lugar.
Innayon na a masapol nga irebisar da amin dagiti CCTV a naimuntar iti nakapasamakan ti krimen ken ti possible a nagnaan ti biktima tapno maamoan no naggapwan na sakbay ti pannakapalto-paltog na.
Kinumpirmaran ni Parado a ti nasao a biktima ket nagpasar iti tama ti paltog iti ngatwen ti lapayag, ulo a simmalpot iti muging ken iti likud ti abaga na.
Kuna na pay a nakarekobre da iti maysa nga slug ti maipagarop a cal. 38 a paltog iti nakapasamakan ti krimen.
