LAOAG CITY – Kinumpirmaran ni Police Captain Christian Felix, ti chief of police idiay Dumalneg, Ilocos Norte ti panagpakamatay ti maysa a babai a taga Barangay San Isidro ti nasao nga ili.
Binigbig na daytoy a ni Madelyn Agreda, agtawen iti 52, awanan ti asawa, maysa a negosyante ken residente ti nasao a barangay.
Segun kenni Felix, nakita lattan ti kabsat ti biktima a nakabitin daytoy iti uneg ti balay na babaen ti panagusar na ti tali ken intaray da iti Rural Health Unit (RHU) iti nasao nga ili ngem saanen a nasalbar ti biag na.
Kuna ni Felix a basar iti imbestigasyon da, agmaymaysa nga agnanaed ti biktima iti balay na ken maipagarop a saan a kayat ti pamilya na ti nobyo na maysa a construction worker.
Inbatad na nga awan ti ammo ti pamilya na a problema na malaksid laeng ti maipagarop a pannakibiang da iti relasyon na iti nobyo na gapu ta saan da kayat daytoy a para kenkuana.
Innayon ti opisyal a mamati ti pamilya ni Agreda nga awan ti foul play iti pannakatay ti biktima.
Nupay kasta, inbatad ni Felix nga agtultuloy ti imbestigasyon da tapno maamoan no anya ti pudno a rason ti panagpakamatay ni Agreda.
