LAOAG CITY – Nagpangta ti Israel a nakasagana daytoy nga isubli ti Iran iti “dark ages,” kabayatan a kumarkaro ti tension iti nagbaetan ti dua a pagilian.
Daytoy ti nagbalin a rakurak ni Israeli Defense Minister Israel Katz no sadinno a nakasagana ti militarda iti maminsan manen a rugi ti opensiba kontra iti Iran.
Inbatad ni Katz a “The targets are marked” ken iyur-urayda laengen ti pammalubos ti Estados Unidos tapno itultuloy ti operasion.
Kuna ti Israeli official, gagemda a naan-anay a pabagsaken ti panangidaulo ti dinastiya ni Khamenei.
Kabayatanna, manamnama nga agtataripnong da Israeli Prime Minister Benjamin Netanyahu kaduana dagiti nangangato nga opisial ti seguridad tapno talantanen ti situasion iti Israel ken Lebanon.
Agtultuloy a kumarkaro ti rinnupak iti nagbaetan ti Estados Unidos ken Iran.
Karaman kadagiti napasamak ti panangagaw ti Amerika kadagiti barko a maipagarup nga adda ti kargana ti langis manipud iti Iran kagiddan iti panangpaserra manen ti Iran ti Strait of Hormuz.
Iti baet kadagiti immuna a panangatake ti Israel a nakatayan ti sumagmamano nga opisial ti Iran, nagtalinaed a natibker ti gobierno ti pagilian.
Nupay kasta, nagballaag ni Katz a ti sumaruno a panangatake ket agbalin nga ad-adda a nakaro ken mangitunda ti nakarkaro a pannakadadael.
