LAOAG CITY – Awan ti foul play iti pannakatay ni John Ryan Andres Adriano, agtawen ti 25 ken residente iti Barangay 28 ditoy ciudad ti Laoag.
Immuna ti daytoy, nakigtot laengen ti ikit ti biktima a ni Lilibeth Seman Andres kalpasan a nakita na ni Adriano a maysan a nalamiis a bangkay iti uneg a mismo ti kwarto.
Iti panagimbestigar dagiti otoridad ket awan ti nakita da nga aniaman a pagilasinan nga adda ti nangpatay ken ni Adriano.
Naamoan nga iti pannakaeksamen ti bangkay ti biktima ket naduktalan a pimmusay kalpasan a naatake iti puso.
Segun ti report, addan ti immuna a panagpasar ti biktima ti cardiac arrest.
Inbatad ti doctor a nangtaming ti bangkay ni Adriano, addan nasurok a pito nga oras ti napalabas sakbay a nakita ti bangkay ti nasao a biktima.
