LAOAG CITY – Kinumpirmaran ni Police Captain Norman Pentang, chief of police ti PNP-Banna a natiliw dan ti maysa kadagiti suspek iti pammaltog a napasamak iti Brgy. 4-Marcos iti nasao nga ili a nakatayan ti maysa nga ama.
Segun kenni Pentang, ti suspek a natiliw ket isu ti gunman, agtawen ti 35 ken residente iti ili ti Nueva Era ken maipagarop a miembro ti gun for hire group idinto a ti kadwa na ket saan da pay a nadeterminar.
Inbatad na a natiliw da ti maysa kadagiti suspek iti ili met laeng iti Nueva Era babaen iti tulong dagiti witnesses.
Kunana a nakarekobre da dagiti kameng ti SOCO ti tallo a kapsula ti maipagarop a klibre 45 a paltog nga isu ti mapapati a nausar iti krimen.
Nupay kasta, kuna ni Pentang a saan da pay a narekobre ti nuasar a paltog.
Iti imbestigayon da, inbatad ni Pentang nga agawid kuman ti da Jamerson Agamata y Calano, agtawen ti 53 ti balasang na a ni Angelina Agamata y Coloma, agtawen ti 20 ken agpada a residente iti Brgy. Nagpatayan iti ili ti Banna, idi napaltogan ti ama babaen kadagiti suspek a nangsaruno kadakuada.
Agtultuloy met a maim-imbestigar no anya ti motibo ti nasao a pammaltog ken no adda ti nakairam-ramanan ti biktima iti kallabes.
Maipalagip a nagsagaba ti ti innem a tama ti bala ti ama nga no sadinno a lima iti barukong ken maysa iti abaga na idinto a ti anak na ket gasgas iti nagduduma a paset ti bagi na.
Kabayatanna, kinumpirmaran ni Barangay Chairman Jondie Bayudan iti Barangay Sto. Niño iti ili ti Nueva Era a ti maitudtudo a suspek iti pammaltog ket maysa kadagiti kagawad na a ni Lucky Paul Baoit.
Kuna ni Bayudan a nasdaaw idi nadamag na a natiliw ti kagawad na gapo ta awan met ti ammo na a madi a rekord ni Baoit.
