LAOAG CITY – Binigbigen ni Bise Mayor Jessie Ermitanio iti ili ti Marcos ti maysa kadagiti suspek a nangtambang kadakuada itay kallabes.
Daytoy ket agnagan ti Alan Gante a residente ti Brgy. Kaestebanan iti ili ti Banna gapu ta nailasin na bayat ti engkwentro.
Kuna na a nabayagen a sursuruten ni Ganti ken dagiti kakadua na idi nagserbi nga acting Mayor nangnangruna no agturong kadagiti barangay.
Inbatad ni Ermitanio a ti latta ubra da no adda isuna iti barangay ket aginmemeryenda dagitoy iti tiangi ken aglabas-labas da.
Mainaig idi daytoy, inpakaammo na a sakbay a mapasamak ti panagtambang ket narikna na nga adda ti dakes a panggep ni Ganti.
Innayon ni Ermitanio nga adda pay ti nailasin na a kakadua ni Ganti ken taga sabali nga ili dagitoy.
Iti agdama, napilaanen ti reklamo ni Ganti kalpasan a nakemmeg dagiti kameng ti PNP Marcos idinto nga agtultuloy latta ti imbestigasyon da.
Maipalagip a patyen ni Ermitanio a politika ti possible a motibo ti pannakatambang da.