Inbatad ni Sangguniang Panlungsod Member John Michael Fariñas a basar iti impormasyon da ket maysa laengen a barangay ti awan ti Child Development Center (CDC) ditoy ciudad ti Laoag.
Kuna na a ti nasao nga impormasyon ket naamoan da manipod iti website ti Early Childhood Care and Development Council wenno ECCD.
Inlawlawag na a rumbeng laeng nga iti kada barangay ket maaddaan ti Child Development Center na agsipud da amin met a barangay ket adda dagiti ubbing nga agkasapulan iti kastoy a pasilidad ken serbisyo.
Innayon na a maibasar iti post iti Early Childhood Care and Development Council ket dua pay a barangay ti awanan ti Child Development Center, karaman ditoy ti Santa Rosa ken Barangay 32-C, ngem inpasigurado met ti kapitan iti maysa kadagiti nadakamat a barangay nga addaan dan ti kastoy a pasilidad.
Gapu iti daytoy, kuna na nga iberipikar da a naimbag ti impormasyon tapno maamoan no kasapulan a mai-update ti impormasyon a naipost iti website ti Early Childhood Care and Development Council.
