LAOAG CITY – Natay ti maysa a lalaki kalpasan a tinagtagbat ti kayong na idiay Brgy. 9 Binacag, Banna, Ilocos Norte.
Binigbig ni Police Chief Inspector Arnel Tabaog, ti chief of police iti ili a Banna ti biktima a ni Mr. William Navarra, agtawen iti 36, naasawaan idinto a ti suspek a kayong na ket ni Romeo Tungpalan, agtawen iti 36 ken agpada dagitoy a residente iti nasao a barangay.
Inbatad ni Tabaog a basar iti imbestigasyon da, kalpasan ti trabaho ni Navarra kas maysa a karpintero ket napan iti balay da Tungpalan tapno saludsuden na no matuloy da nga agubra iti balay ti suspek iti daytoy nga aldaw.
Inpakaammo ni Tabaog a ditoy a nagriri dagiti dua kalpasan a sinalangad ti suspek ti biktima no apay a saan a napag nagubra idi kalman, aldaw iti sabado.
Segun ken ni Tabaog, apaman a nadlaw ti asawa ni Navarra a ni Elynor Navarra, agtawen iti 30, nga agrirriri dagiti dua ket napan immasideg tapno iyawid na koma ti asawa na.
Nupay kasta, innala ni Tungpalan ti buneng na ket intagbat na kadagiti agasawa a nakatamaan ti timed ni Elynor.
Naamoan a ginandat ni William Navarra ti agtaray ngem nagammatan ni Tungpalan ken ditoyen a tinagba-tagbat na iti namin-ado a daras.
Naitaray ti biktima iti Nueva Era Lying In-Clinic, Nueva Era ngem naideklara a dead on arrival idinto a naipaagas met ti asawa na a ni Elynor iti Dona Josefa Edralin Marcos District Hospital iti ili a Marcos.
