LAOAG CITY – Nagpalagip ti Department of Health (DOH) iti publiko nga agannad kontra iti chronic kidney disease (CKD) wenno sakit iti bato, kalpasan a rimuar iti datos a mapatta-patta a 36% dagiti Pilipino wenno maysa iti kada tallo nga indibidual ket apektado iti daytoy.
Basar iti Department of Health, ti chronic kidney disease ket maysa a kondisyon no sadinno nga in-inot a kumapkapoy ti panaggaraw dagiti bato nga agresulta ti pannakarigat nga agrugit ken nalabes a danom iti bagi.
Dinakamat ti ahensya a mabalin a mapasaran daytoy ti siasinno man ngem nangatngato ti risgo na kadagiti addaan ti diabetes, altapresyon, obesity, family history ti sakit iti bato, dagiti agsigsigarilyo wenno umin-inom ti arak.
Iti report, umaboten iti sumuruk-kumurang a P27 bilyon a pisos ti nagastos ti Philippine Health Insurance Corporation wenno PhilHealth para iti nasurok a dua a milyon a dialysis claims iti umuna nga innem a bolan laeng ti 2025.
Inawagan pay ti ahensya ti chronic kidney disease kas “silent killer” gapu ta masansan nga awan ti sintomas iti nasapa a gundaway.
Inbalakad ti Department of Health ti regular a panaginom ti danom, panag-ehersisyo, ken liklikan ti bisyo tapno mapagtalinaed a nasalun-at dagiti bato iti bagi ti tao.
